Економски науки

Студиската програма Економски науки организирана од страна на Економски факултет – Скопје е од трет циклус, докторски студии, или VIII ниво според Националната рамка за високообразовните квалификации, односно ниво 8 според Европската рамка за високообразовни квалификации.

Живееме во време на реафирмација на економската наука, преку нејзино препромислување и ремоделирање. Глобализирањето на економските текови, фундаменталните структурни промени во светската економија, неодамнешната финансиска криза и резултирачката рецесија – сето тоа вбризга нова, свежа енергија во економската теорија, применетите економски дисциплини и емпириските економски анализи.

Студиската програма за трет циклус на студии од областа на економските студии, што овде се предлага, претставува обид да се одговори на предизвиците што ваквите фундаментални промени во глобалната економија ги поставуваат пред економската наука, економските политики и деловните политики на економските организации. Во студиската програма фактички се опфатени три пошироки области на економските науки: економијата, финансиите и маркетингот.

Дисциплините кои произлегуваат од овие три области ќе им овозможат на студентите да стекнувааат напредни знаења и аналитичко-истражувачки способности на еден широк спектар на економски прашања и проблеми, како што се: микроекономските и макроекономските аналитички модели, моделите на меѓународната економија, микроекономската регулација, макроекономските политики (монетарна, фискална, политика на девизен курс, надворешно-трговска политика); потоа, пазарите, институциите и инструментите кои го сочинуваат финансискиот систем, јавните и корпоративните финансии; исто така, новите теоретски и практични продори во областа на маркетингот, посебно во врска со револуцијата во областа на комуникациите и бихејвиоралните анализи; како и прашањата во врска со економиката на фирмите и нивното управување во услови на криза и тн.

Докторската студиска програма по Економски науки е организирана во согласност со правилата на европскиот кредит трансфер систем и има за цел профилирање на кадри за самостојно спроведување на оргинални научни истражувања. Здобивајќи се со напредни теоретско-апликативни знаења, студентите ќе се оспособат за изработка на комплексни економски анализи и доаѓање до предлози за ефикасно решавање на економските проблеми, било на ниво на економијата како целина, било на ниво на поединечни економомски сектори и поединечни фирми. Развиените автономни истражувачки капацитети на докторантите ќе придонесат во градењето на нивната понатамошна кариера во бизнис секторот, нефинансиски и финансиски; потоа секторот на државните институции и јавни претпријатија; како и секторот на академските институции.

ГОДИНИ И СЕМЕСТРИ НА ТРАЕЊЕ НА СТУДИСКАТА ПРОГРАМА

Студиската програма по економски науки се организира во траење од 3 години, односно 6 семестри.

ЕКТС КРЕДИТИ СО КОИ СЕ СТЕКНУВА СТУДЕНТОТ

Со завршување на тригодишните универзитетски, докторски студии од трет циклус, студиска програма Економски науки, студентот се стекнува со 180 ЕКТС кредити.

НАЧИН НА ФИНАНСИРАЊЕ НА СТУДИСКАТА ПРОГРАМА

Докторските студии се реализираат со самофинансирање на кандидатите. Изворите за самофинансирање на кандидатите може да бидат потпомогнати со стипендии, средства на компании, како и средства кои би се обезбедиле преку други фондови и грантови на меѓународни институции. Висината на износот, начинот на уплата, како и сите други услови се регулирани со Правилник за условите, критериумите и правилата за запишување и студирање нa трет циклус на студии на Универзитетот „Св. Кирил и Mетодиј” во Скопје, како и со актите на Економскиот факултет – Скопје.

УСЛОВИ ЗА ЗАПИШУВАЊЕ

Запишувањето на докторските студии се врши врз основа на конкурс кој го објавува Универзитетот. Постапката за донесување и објавување на конкурсот е утврдена со закон и со Правилникот за условите, критериумите и правилата за запишување и студирање на трет циклус на студии на Универзитетот „Св. Кирил и Методиј„ во Скопје. Право за запишување на докторски студии имаат лица кои завршиле соодветни студиски програми и кои ги исполнуваат основните критериуми:

• завршен II циклус на студии усогласени со европскиот кредит трансфер систем (ЕКТС-кредити);
• завршени постдипломски студии по студиските програми пред воведувањето на европскиот кредит-трансфер систем, на кои им се признаваат 60 кредити од обука за истражување и едукација;
• стекната стручна подготовка според студиски програми за регулирани професии, со остварени најмалку 300 ЕКТС-кредити;
• остварен просечен успех од сите предмети од претходно завршеното високо образование, од најмалку 8,00;
• познавање на еден од светските јазици. Доказ за познавање на светски јазик е сертификат од Филолошкиот факултет “Блаже Конески” или меѓународен сертификат или диплома за претходно стекнато образование на соодветниот светски јазик.

За кандидатите кои не ги исполнуваат условите од четвртиот критериум, во зависност од спецификите на научната област, советот на студиската програма може да утврди дополнителни критериуми за запишување. Соодветноста на претходно завршените студии се утврдува од страна на Советот на студиската програма за докторски студии.